Why the Dinosaur Age Experienced Extreme Climate Shifts: ദിനോസറുകളുടെ കാലത്ത് ഭൂമി എന്തുകൊണ്ട് ഇടയ്ക്കിടെ കൂടുതൽ ചൂടുപിടിച്ചു?

ദിനോസറുകളുടെ കാലത്ത് ഭൂമി എന്തുകൊണ്ട് ഇടയ്ക്കിടെ കൂടുതൽ ചൂടുപിടിച്ചു?

ദിനോസറുകളുടെ കാലത്തെ ഭൂമിയെ പലപ്പോഴും വലിയ കാലാവസ്ഥാ വ്യതിയാനങ്ങളില്ലാത്ത സ്ഥിരതയുള്ള ലോകമായാണ് നമ്മൾ സങ്കൽപ്പിക്കുന്നത്. എന്നാൽ പുതിയ ശാസ്ത്രീയ പഠനങ്ങൾ സൂചിപ്പിക്കുന്നത് അതല്ല. പുറമേ ശാന്തമെന്ന് തോന്നിയിരുന്ന ആ കാലഘട്ടത്തിനുള്ളിലും കാലാവസ്ഥ നിരന്തരം മാറിക്കൊണ്ടിരുന്നുവെന്നാണ് കണ്ടെത്തൽ.

ഭൂമിയുടെ ഭ്രമണത്തിലും പരിക്രമണത്തിലും സംഭവിച്ച സൂക്ഷ്മമായ വ്യതിയാനങ്ങൾ ക്രിറ്റേഷ്യസ് കാലഘട്ടത്തിലെ (Cretaceous Period) കാലാവസ്ഥയെ സ്വാധീനിച്ചിരുന്നുവെന്ന് അവശിഷ്ട പഠനങ്ങൾ വ്യക്തമാക്കുന്നു. ആയിരക്കണക്കിന് വർഷങ്ങളുടെ ഇടവേളകളിൽ ആവർത്തിച്ച ഈ ചക്രങ്ങൾ ഭൂമിയെ ഇടയ്ക്കിടെ കൂടുതൽ ചൂടുള്ളതും വരണ്ടതുമായ അവസ്ഥകളിലേക്ക് നയിച്ചിരിക്കാമെന്നാണ് ശാസ്ത്രജ്ഞരുടെ വിലയിരുത്തൽ.

ഭൂമി ഒരേ രീതിയിൽ കറങ്ങുന്നില്ല

സൂര്യോദയവും സൂര്യാസ്തമയവും ഋതുക്കളുടെ ആവർത്തനവും നോക്കുമ്പോൾ ഭൂമിയുടെ ചലനങ്ങൾ മാറ്റമില്ലാത്തവയാണെന്ന് തോന്നാം. എന്നാൽ യാഥാർത്ഥ്യത്തിൽ ഭൂമി ഒരു സ്ഥിര യന്ത്രമല്ല. സ്വന്തം അച്ചുതണ്ടിന് ചുറ്റുമുള്ള ചലനത്തെ ഭ്രമണം (Rotation) എന്നും സൂര്യനെ ചുറ്റുന്ന ചലനത്തെ പരിക്രമണം (Revolution) എന്നും വിളിക്കുന്നു. എന്നാൽ ഇതിനപ്പുറം ഭൂമിയുടെ അച്ചുതണ്ടിന്റെ ചരിവ് (Obliquity), പരിക്രമണപഥത്തിന്റെ ആകൃതി (Eccentricity), അച്ചുതണ്ടിന്റെ ദിശാമാറ്റം (Precession) എന്നിവയും കാലക്രമത്തിൽ മാറിക്കൊണ്ടിരിക്കുന്നു.

മനുഷ്യജീവിതത്തിൽ തിരിച്ചറിയാൻ കഴിയാത്തത്ര മന്ദഗതിയിലുള്ള ഈ മാറ്റങ്ങൾ ആയിരക്കണക്കിനും ലക്ഷക്കണക്കിനും വർഷങ്ങളിലായി ഭൂമിയിലെ സൂര്യോർജ വിതരണത്തെ സ്വാധീനിക്കുകയും കാലാവസ്ഥയിൽ വലിയ വ്യതിയാനങ്ങൾ സൃഷ്ടിക്കുകയും ചെയ്യുന്നു.

പമ്പരം കറങ്ങുന്നതുപോലെ ഭൂമിയും

കറങ്ങുന്ന പമ്പരത്തിന്റെ അച്ചുതണ്ട് മെല്ലെ ചാഞ്ചാടുന്നത് എല്ലാവരും കണ്ടിട്ടുണ്ടാകും. ഭൂമിയുടെ അച്ചുതണ്ടും സമാനമായ ഒരു ചലനം കാണിക്കുന്നു. ഇതാണ് പ്രിസഷൻ (Precession).
ചന്ദ്രന്റെയും സൂര്യന്റെയും ഗുരുത്വാകർഷണ സ്വാധീനഫലമായി ഭൂമിയുടെ അച്ചുതണ്ട് വളരെ സാവധാനത്തിൽ ദിശമാറ്റിക്കൊണ്ടിരിക്കുന്നു. ഒരു പൂർണ പ്രിസഷൻ ചക്രം പൂർത്തിയാകാൻ ഏകദേശം 26,000 വർഷമെടുക്കും. 

ഈ ചെറിയ മാറ്റങ്ങൾ വിവിധ പ്രദേശങ്ങളിലെ സൂര്യപ്രകാശ വിതരണത്തെ ബാധിക്കുകയും ദീർഘകാല കാലാവസ്ഥാ വ്യതിയാനങ്ങൾക്ക് കാരണമാവുകയും ചെയ്യുന്നു.

ആകാശത്തിലെ മൂന്ന് കാലാവസ്ഥാ ഘടികാരങ്ങൾ

ഭൂമിയുടെ കാലാവസ്ഥയെ ദീർഘകാലാടിസ്ഥാനത്തിൽ സ്വാധീനിക്കുന്ന ഈ ജ്യോതിശാസ്ത്ര വ്യതിയാനങ്ങളെ മിലാങ്കോവിച്ച് ചക്രങ്ങൾ (Milankovitch Cycles) എന്നാണ് അറിയപ്പെടുന്നത്.

ഇവയുടെ പ്രധാന ഘടകങ്ങൾ

* അച്ചുതണ്ടിന്റെ ചരിവിലെ വ്യതിയാനം (Obliquity) – ഏകദേശം 41,000 വർഷത്തെ ചക്രം.
* പരിക്രമണപഥത്തിന്റെ ആകൃതിയിലെ മാറ്റം (Eccentricity) – 100,000 മുതൽ 400,000 വർഷം വരെ നീളുന്ന ചക്രങ്ങൾ.
* അച്ചുതണ്ടിന്റെ ദിശാമാറ്റം (Precession) – ഏകദേശം 26,000 വർഷത്തെ ചക്രം.

ഈ മൂന്ന് ഘടകങ്ങളും ചേർന്ന് ഭൂമിയിലെ സൂര്യോർജ വിതരണത്തിൽ ദീർഘകാല മാറ്റങ്ങൾ സൃഷ്ടിക്കുന്നു.
ദിനോസറുകളുടെ അവസാനകാലഘട്ടമായ ക്രിറ്റേഷ്യസ് ഭൂമി ഇന്നത്തെ ഭൂമിയിൽനിന്ന് വളരെ വ്യത്യസ്തമായിരുന്നു.
അന്ന് ധ്രുവപ്രദേശങ്ങളിൽ സ്ഥിരമായ ഹിമപാളികൾ (Ice Sheets) ഉണ്ടായിരുന്നില്ല. സമുദ്രനിരപ്പ് ഇന്നത്തേതിനെക്കാൾ ഉയർന്നതായിരുന്നു. അന്തരീക്ഷത്തിലെ കാർബൺ ഡൈഓക്സൈഡ് (CO₂) അളവ് നിലവിലെ നിലയെക്കാൾ പലമടങ്ങ് കൂടുതലായിരുന്നുവെന്നാണ് വിലയിരുത്തൽ.
അതുകൊണ്ടുതന്നെ ശാസ്ത്രജ്ഞർ ഈ കാലഘട്ടത്തെ “ഹരിതഗൃഹ ഭൂമി” (Greenhouse Earth) എന്നാണ് വിശേഷിപ്പിക്കുന്നത്.
എന്നാൽ ഇത്രയും ചൂടേറിയ ലോകവും പൂർണമായും സ്ഥിരതയുള്ളതായിരുന്നില്ല.

ചൈനയിലെ സോങ്‌ലിയാവോ ബേസിൻ (Songliao Basin) പ്രദേശത്ത് നിന്നുള്ള അവശിഷ്ട കോറുകൾ (Sediment Cores) പരിശോധിച്ച ഗവേഷകർക്ക് കൗതുകകരമായ കണ്ടെത്തലുകളാണ് ലഭിച്ചത്.
ആർദ്രവും വരണ്ടതുമായ കാലാവസ്ഥകൾ യാദൃശ്ചികമായി മാറിയതല്ല. ഏകദേശം 4,000 മുതൽ 5,000 വർഷങ്ങൾക്കിടയിൽ വ്യക്തമായ ഒരു താളത്തിൽ അവ ആവർത്തിച്ചിരുന്നതായി കണ്ടെത്തി.

അതോടൊപ്പം 1,800 മുതൽ 4,000 വർഷം വരെ ദൈർഘ്യമുള്ള ചെറു കാലാവസ്ഥാ ചക്രങ്ങളും രേഖകളിൽ തിരിച്ചറിഞ്ഞു.

ഇതിലൂടെ ക്രിറ്റേഷ്യസ് കാലഘട്ടം സ്ഥിരതയുള്ളതല്ലെന്നും പലതരം കാലാവസ്ഥാ ചലനങ്ങളുടെ സംയുക്ത ഫലമായിരുന്നുവെന്നും വ്യക്തമാകുന്നു.

ഇന്നത്തെ ഭൂമിക്കുള്ള മുന്നറിയിപ്പാണോ?

ഇന്ന് ആഗോളതലത്തിൽ CO₂ നില തുടർച്ചയായി ഉയരുകയാണ്. ചില കാലാവസ്ഥാ മാതൃകകൾ പ്രകാരം ഭാവിയിൽ ഇത് 1,000 പി.പി.എം (ppm) വരെ എത്താൻ സാധ്യതയുണ്ട്. സോങ്‌ലിയാവോ ബേസിനിൽ നിന്നുള്ള പഠനങ്ങൾ നൽകുന്ന പ്രധാന സന്ദേശം, ഉയർന്ന CO₂ നിലയുള്ള ഭൂമി സ്ഥിരതയുള്ളതായിരിക്കണമെന്നില്ല. ഭൂമിയുടെ ഭ്രമണ–പരിക്രമണ ചക്രങ്ങളിലെ സൂക്ഷ്മ വ്യതിയാനങ്ങൾ പോലും കാലാവസ്ഥയെ സ്വാധീനിക്കാൻ കഴിയുമെന്ന് ഈ പഠനങ്ങൾ സൂചിപ്പിക്കുന്നു. അതിനാൽ ഭാവിയിലെ കാലാവസ്ഥാ മാറ്റങ്ങളെ മനസ്സിലാക്കാൻ പുരാതന ഹരിതഗൃഹ ഭൂമിയുടെ ചരിത്രം കൂടുതൽ പ്രാധാന്യമർഹിക്കുന്നതായി ശാസ്ത്രലോകം വിലയിരുത്തുന്നു.

ഭൂമിയുടെ കാലാവസ്ഥ ഒരിക്കലും പൂർണമായും സ്ഥിരതയുള്ളതായിരുന്നില്ല. ദിനോസറുകളുടെ കാലത്തെ ചൂടേറിയ ലോകത്തുപോലും ആയിരക്കണക്കിന് വർഷങ്ങളുടെ ഇടവേളകളിൽ കാലാവസ്ഥ ഉയർച്ചതാഴ്ചകൾ കാണിച്ചിരുന്നു. ഇന്ന് മനുഷ്യനിർമിത കാലാവസ്ഥാ മാറ്റങ്ങൾ ശക്തമാകുന്ന സാഹചര്യത്തിൽ, ഭൂതകാലത്തിലെ ഈ പാഠങ്ങൾ ഭാവിയെ മനസ്സിലാക്കാനുള്ള നിർണായക സൂചനകളായി മാറുകയാണ്.

English Summary : New scientific data reveals the dinosaur era was far from a stable tropical paradise. Discover how Earth's orbital shifts, known as Milankovitch Cycles, triggered intense, rhythmic climate changes during the Cretaceous Period, offering crucial warnings for modern global warming.

അഞ്ച് നൂറ്റാണ്ടുകൾക്ക് ശേഷം മരുഭൂമിക്കടിയിൽ നിന്ന് സ്വർണനിധിയുമായി പോർച്ചുഗീസ് കപ്പൽ

അഞ്ച് നൂറ്റാണ്ട് മുമ്പ് ഇന്ത്യയിലേക്ക് പുറപ്പെട്ട ശേഷം ദുരൂഹമായി കാണാതായ പോർച്ചുഗീസ് കപ്പൽ ‘ബോം ജീസസ്’ (Bom Jesus) നമീബിയൻ മരുഭൂമിക്കടിയിൽ നിന്ന് കണ്ടെത്തി. അറ്റ്ലാന്റിക് സമുദ്രതീരത്തെ ഒറാഞ്ചെമുണ്ട് (Oranjemund) പ്രദേശത്തിന് സമീപം വജ്രഖനനത്തിനിടെ യാദൃശ്ചികമായാണ് 16-ാം നൂറ്റാണ്ടിലെ ഈ ചരിത്രപ്രസിദ്ധമായ കപ്പലിന്റെ അവശിഷ്ടങ്ങൾ കണ്ടെത്തിയത്.

ഇന്ത്യയിലേക്കുള്ള യാത്ര ദുരന്തത്തിൽ അവസാനിച്ചു

1533 മാർച്ച് 7-ന് പോർച്ചുഗലിലെ ലിസ്ബൺ (Lisbon) നഗരത്തിൽ നിന്ന് ഇന്ത്യ ലക്ഷ്യമാക്കി യാത്ര തിരിച്ചതാണ് ‘ബോം ജീസസ്’. യൂറോപ്പ്, ആഫ്രിക്ക, ഏഷ്യ എന്നിവിടങ്ങൾ തമ്മിലുള്ള സമുദ്രവ്യാപാരത്തിൽ നിർണായക പങ്കുവഹിച്ചിരുന്ന കൂറ്റൻ കപ്പലുകളിൽ ഒന്നായിരുന്നു ഇത്. എന്നാൽ യാത്രയ്ക്കിടെ ആഫ്രിക്കൻ തീരത്ത് ശക്തമായ കൊടുങ്കാറ്റിലും അതിശക്തമായ തിരമാലകളിലുംപ്പെട്ട കപ്പൽ നമീബിയൻ തീരത്തെ മണൽത്തിട്ടയിൽ കുടുങ്ങിയെന്നാണ് ചരിത്രകാരന്മാർ വിലയിരുത്തുന്നത്. തുടർന്ന് കപ്പൽ പൂർണമായും കാണാതാവുകയായിരുന്നു.

നമീബിയൻ മരുഭൂമിയിലെ വരണ്ട കാലാവസ്ഥയും തണുത്ത സമുദ്രജലവും കാരണം കപ്പലിന്റെ വലിയൊരു ഭാഗവും അതിലുണ്ടായിരുന്ന വിലപിടിപ്പുള്ള വസ്തുക്കളും നൂറ്റാണ്ടുകൾ കഴിഞ്ഞിട്ടും കേടുപാടുകളില്ലാതെ സംരക്ഷിക്കപ്പെട്ടതായി പുരാവസ്തു ഗവേഷകർ വ്യക്തമാക്കി. 

2,000-ത്തിലധികം സ്വർണ-വെള്ളി നാണയങ്ങൾ

പരിശോധനയിൽ കപ്പലിൽ നിന്ന് 2,000-ത്തിലധികം സ്വർണ-വെള്ളി നാണയങ്ങൾ, 17 ടൺ ഭാരമുള്ള 1,845 ചെമ്പ് കട്ടകൾ, പശ്ചിമാഫ്രിക്കയിൽ നിന്നുള്ള 105 ആനക്കൊമ്പുകൾ എന്നിവ കണ്ടെത്തി. യൂറോപ്പും ആഫ്രിക്കയും തമ്മിലുണ്ടായിരുന്ന ശക്തമായ വ്യാപാരബന്ധങ്ങളുടെ തെളിവായാണ് ഈ കണ്ടെത്തലിനെ വിലയിരുത്തുന്നത്.

കപ്പലിലുണ്ടായിരുന്ന കോടിക്കണക്കിന് രൂപ വിലമതിക്കുന്ന നിധികൾ കണ്ടെത്താനായെങ്കിലും, അതിലെ ജീവനക്കാരുടെ വിധി ഇന്നും ദുരൂഹമായി തുടരുകയാണ്.
ചരിത്രരേഖകൾ പ്രകാരം ഏകദേശം 200 ഓളം നാവികരും തൊഴിലാളികളും കപ്പലിലുണ്ടായിരുന്നുവെന്നാണ് കരുതുന്നത്. എന്നാൽ മനുഷ്യശരീരത്തിന്റെ യാതൊരു അവശിഷ്ടവും കപ്പലിലോ സമീപപ്രദേശങ്ങളിലോ നിന്ന് കണ്ടെത്താനായിട്ടില്ല.

കപ്പൽ തകർന്നപ്പോൾ എല്ലാവരും കടലിൽ മുങ്ങിമരിച്ചിരിക്കാമെന്നോ, അല്ലെങ്കിൽ ജീവനോടെ കരയിലെത്തിയെങ്കിലും കുടിവെള്ളവും ഭക്ഷണവും ലഭിക്കാതെ നമീബിയൻ മരുഭൂമിയിൽ മരിച്ചിരിക്കാമെന്നോ ഗവേഷകർ അനുമാനിക്കുന്നു.

 ‘ബോം ജീസസ്’ 

ആഫ്രിക്കൻ തീരത്ത് ഇതുവരെ കണ്ടെത്തിയിട്ടുള്ള ഏറ്റവും പ്രധാനപ്പെട്ട കപ്പൽച്ചേതങ്ങളിൽ ഒന്നായാണ് ‘ബോം ജീസസ്’ കണ്ടെത്തൽ വിലയിരുത്തപ്പെടുന്നത്. നൂറ്റാണ്ടുകൾ പഴക്കമുള്ള സമുദ്രവ്യാപാര ചരിത്രത്തെയും പോർച്ചുഗീസ് നാവികയാത്രകളെയും കുറിച്ചുള്ള കൂടുതൽ വിവരങ്ങൾ പുറത്തുകൊണ്ടുവരാൻ ഈ കണ്ടെത്തൽ സഹായിക്കുമെന്ന് ഗവേഷകർ പ്രതീക്ഷിക്കുന്നു. 

English Summary : Archaeologists uncover the 1533 Portuguese ship 'Bom Jesus' buried in the Namibian desert, loaded with gold, silver, ivory, and centuries-old mysteries.