Solar Geoengineering: സൂപ്പർ എൽ നിനോയെ തണുപ്പിക്കാൻ 'സൺ ഡിമ്മിങ്' ?; സൂര്യപ്രകാശം കുറയ്ക്കുന്ന ആശയവുമായി ശാസ്ത്രജ്ഞർ

സൂപ്പർ എൽ നിനോയെ തണുപ്പിക്കാൻ 'സൺ ഡിമ്മിങ്' ?; സൂര്യപ്രകാശം കുറയ്ക്കുന്ന ആശയവുമായി ശാസ്ത്രജ്ഞർ

ലോകമെമ്പാടും ആശങ്കയുണർത്തുന്ന എൽ നിനോ (El Niño) പ്രതിഭാസത്തിന്റെ തീവ്രത കുറയ്ക്കാൻ സൂര്യപ്രകാശത്തിന്റെ അളവ് നിയന്ത്രിക്കുന്ന പുതിയ ആശയവുമായി ശാസ്ത്രജ്ഞർ രംഗത്ത്. കടുത്ത വരൾച്ച, ഉഷ്‌ണതരംഗങ്ങൾ (Heatwaves), കാട്ടുതീ, കാർഷിക നഷ്ടം, ജലക്ഷാമം തുടങ്ങിയ പ്രത്യാഘാതങ്ങൾക്ക് കാരണമാകുന്ന സൂപ്പർ എൽ നിനോ (Super El Niño) സാഹചര്യങ്ങളെ നേരിടാൻ സൺ ഡിമ്മിങ് (Sun Dimming) എന്ന ആശയമാണ് ഗവേഷകർ മുന്നോട്ടുവയ്ക്കുന്നത്.

അമേരിക്കയിലെ യൂണിവേഴ്‌സിറ്റി ഓഫ് കാലിഫോർണിയ, സാൻ ഡിയാഗോ (University of California San Diego - UC San Diego) ഗവേഷകരുടെ പഠനമാണ് സയൻസ് അഡ്വാൻസസ് (Science Advances) ജേണലിൽ പ്രസിദ്ധീകരിച്ചിരിക്കുന്നത്.

എൽ നിനോയുടെ ആഘാതം എന്ത്?

മധ്യ-കിഴക്കൻ പസഫിക് സമുദ്രത്തിലെ ഉപരിതല ജലത്തിന്റെ അസാധാരണമായ ചൂടേറലാണ് എൽ നിനോ. ഇത് ലോകത്തിന്റെ വിവിധ ഭാഗങ്ങളിലെ മഴയുടെ വിതരണത്തെയും താപനിലയെയും നേരിട്ട് ബാധിക്കുന്നു. ഇന്ത്യയിൽ എൽ നിനോ വർഷങ്ങളിൽ സാധാരണയായി തെക്കുപടിഞ്ഞാറൻ കാലവർഷം (Southwest Monsoon) ദുർബലമാകാനും മഴക്കുറവ് അനുഭവപ്പെടാനും സാധ്യത കൂടുതലാണ്. ഇതോടെ കാർഷികോൽപാദനം, ജലലഭ്യത, ജലവൈദ്യുതി ഉൽപാദനം, ഭക്ഷ്യവില, വൈദ്യുതി ആവശ്യകത എന്നിവയെല്ലാം സമ്മർദത്തിലാകും. അതേസമയം ദക്ഷിണ അമേരിക്കയിലെ ചില പ്രദേശങ്ങളിൽ അതിശക്തമായ മഴയും വെള്ളപ്പൊക്കവും ഉണ്ടാകാറുണ്ട്.

എന്താണ് സൺ ഡിമ്മിങ് (Sun Dimming)?

സോളാർ ജിയോ എൻജിനിയറിങ് (Solar Geoengineering) എന്ന ആശയത്തെ അടിസ്ഥാനമാക്കിയുള്ള സാങ്കേതികവിദ്യയാണ് സൺ ഡിമ്മിങ്. സൂര്യപ്രകാശത്തിന്റെ ഒരു ചെറിയ ഭാഗം ഭൂമിയുടെ ഉപരിതലത്തിലെത്തുന്നതിന് മുമ്പ് ബഹിരാകാശത്തേക്ക് തിരിച്ചുവിടുക എന്നതാണ് ഇതിന്റെ പ്രധാന ലക്ഷ്യം. അങ്ങനെ ഭൂമിയുടെ ശരാശരി താപനില കുറയ്ക്കാനും എൽ നിനോ മൂലമുണ്ടാകുന്ന അമിത ചൂടിന്റെ ആഘാതം കുറയ്ക്കാനുമാകുമെന്നാണ് ഗവേഷകരുടെ വിലയിരുത്തൽ.

എങ്ങനെ പ്രവർത്തിക്കും?

ഗവേഷകരുടെ നിർദേശമനുസരിച്ച് അന്തരീക്ഷത്തിലെ സ്ട്രാറ്റോസ്ഫിയർ (Stratosphere) ഭാഗത്തേക്ക് പ്രത്യേക എയറോസോൾ കണങ്ങൾ (Aerosols) എത്തിക്കുകയോ സമുദ്രത്തിന് മുകളിലുള്ള മേഘങ്ങളെ കൂടുതൽ വെളുപ്പിച്ച് (Marine Cloud Brightening) കൂടുതൽ സൂര്യപ്രകാശം തിരിച്ചുവിടാൻ സഹായിക്കുകയോ ചെയ്യാം.
ഇതിലൂടെ ഭൂമിയിലേക്ക് ആഗിരണം ചെയ്യുന്ന സൗരോർജത്തിന്റെ അളവ് കുറയുകയും ഉപരിതല താപനില നിയന്ത്രണവിധേയമാകുകയും ചെയ്യുമെന്നാണ് പഠനം ചൂണ്ടിക്കാട്ടുന്നത്.

അഗ്നിപർവതങ്ങളിൽ നിന്ന് ലഭിച്ച സൂചന

വലിയ അഗ്നിപർവത സ്ഫോടനങ്ങൾക്ക് പിന്നാലെ അന്തരീക്ഷത്തിലേക്ക് സൾഫേറ്റ് കണങ്ങൾ വ്യാപകമായി ഉയരുകയും അതിന്റെ ഫലമായി ഏതാനും വർഷത്തേക്ക് ആഗോള താപനിലയിൽ ചെറിയ കുറവ് രേഖപ്പെടുത്തുകയും ചെയ്തിട്ടുണ്ടെന്ന് ശാസ്ത്രജ്ഞർ ചൂണ്ടിക്കാണിക്കുന്നു. അതേ പ്രകൃതിദത്ത പ്രതിഭാസത്തെ ശാസ്ത്രീയമായി നിയന്ത്രിതരീതിയിൽ പ്രയോജനപ്പെടുത്താനാണ് സൺ ഡിമ്മിങ് ലക്ഷ്യമിടുന്നത്.

സൺ ഡിമ്മിങ് കാലാവസ്ഥാ പ്രതിസന്ധിക്ക് സ്ഥിരപരിഹാരമല്ലെന്നാണ് നിരവധി വിദഗ്‌ദരുടെ അഭിപ്രായം. പഠനത്തിന്റെ സഹരചയിതാവായ ജെസിക്ക വാൻ (Jessica Wan) പറയുന്നതനുസരിച്ച്, ഈ സാങ്കേതികവിദ്യ ആരംഭിച്ചാൽ അതിന്റെ ഫലം നിലനിർത്താൻ ദീർഘകാലം തുടർച്ചയായി നടപ്പാക്കേണ്ട സാഹചര്യമുണ്ടാകാം. ഇടയ്ക്ക് ഇത് അവസാനിപ്പിച്ചാൽ ഭൂമിയുടെ താപനില അതിവേഗം ഉയരാനുള്ള സാധ്യതയും നിലനിൽക്കുന്നു.

കാർബൺ കുറയ്ക്കലിന് പകരമാകില്ല

കാലാവസ്ഥാ വ്യതിയാനത്തിന്റെ അടിസ്ഥാന കാരണം ഹരിതഗൃഹ വാതകങ്ങളുടെ (Greenhouse Gases) അമിത പുറന്തള്ളലാണെന്നും അതിനുള്ള യഥാർഥ പരിഹാരം കാർബൺ പുറന്തള്ളൽ കുറയ്ക്കുന്നതാണെന്നും ശാസ്ത്രലോകം ഓർമ്മിപ്പിക്കുന്നു.

ജിയോ എൻജിനിയറിങ് (Geoengineering) പോലുള്ള സാങ്കേതിക വിദ്യകളിൽ അമിതമായി ആശ്രയിക്കുന്നത് കാർബൺ കുറയ്ക്കാനുള്ള ആഗോള ശ്രമങ്ങളിൽ നിന്ന് രാജ്യങ്ങളുടെ ശ്രദ്ധ തിരിക്കുമെന്ന ആശങ്കയും വിദഗ്‌ദർ ഉയർത്തുന്നു.

മുന്നറിയിപ്പുമായി ശാസ്ത്രജ്ഞർ

ടെക്സാസ് എ&എം സർവകലാശാല (Texas A&M University)യിലെ അന്തരീക്ഷശാസ്ത്രജ്ഞൻ ആൻഡ്രൂ ഡെസ്ലർ (Andrew Dessler) മുന്നറിയിപ്പ് നൽകുന്നത്, നിലവിലെ കാലാവസ്ഥാ മാതൃകകൾ (Climate Models) ഇപ്പോഴും പൂർണ കൃത്യതയുള്ളതല്ലെന്നാണ്. അതിനാൽ ഭൂമിയുടെ വികിരണ സന്തുലിതാവസ്ഥയിൽ (Radiative Balance) കൃത്രിമമായി ഇടപെടുന്നത് നിലവിലുള്ള പ്രശ്നങ്ങൾ കുറയ്ക്കുന്നതിന് പകരം പുതിയതും പ്രവചിക്കാനാകാത്തതുമായ പ്രത്യാഘാതങ്ങൾ സൃഷ്ടിക്കാൻ സാധ്യതയുണ്ടെന്നും അദ്ദേഹം ചൂണ്ടിക്കാട്ടുന്നു.

സൺ ഡിമ്മിങ് സാങ്കേതികവിദ്യ നിലവിൽ പ്രായോഗികമായി നടപ്പാക്കാനോ പരീക്ഷിക്കാനോ അന്താരാഷ്ട്രതലത്തിൽ തീരുമാനമായിട്ടില്ല. എന്നിരുന്നാലും കാലാവസ്ഥാ പ്രതിസന്ധി കൂടുതൽ രൂക്ഷമാകുന്ന സാഹചര്യത്തിൽ എൽ നിനോ പോലുള്ള തീവ്ര കാലാവസ്ഥാ പ്രതിഭാസങ്ങളുടെ ആഘാതം കുറയ്ക്കാനുള്ള സാധ്യതകളിൽ ഒന്നായി ഈ ആശയത്തെ കൂടുതൽ വിശദമായി പഠിക്കേണ്ടതുണ്ടെന്നാണ് ഗവേഷകസംഘത്തിന്റെ നിലപാട്.

അതേസമയം, ഭൂമിയെ സംരക്ഷിക്കാനുള്ള ഏറ്റവും സുരക്ഷിതവും ദീർഘകാല ഫലപ്രദവുമായ മാർഗം ഹരിതഗൃഹ വാതകങ്ങളുടെ പുറന്തള്ളൽ കുറയ്ക്കുകയും പുനരുപയോഗ ഊർജസ്രോതസുകളിലേക്ക് (Renewable Energy) വേഗത്തിൽ മാറുകയും ചെയ്യുന്നതാണെന്ന കാര്യത്തിൽ ശാസ്ത്രലോകത്തിന് ഇന്നും ഏകാഭിപ്രായമാണ്. 

English Summary : Researchers at the University of California San Diego (UC San Diego) have proposed a radical climate intervention technique known as "Sun Dimming" (Solar Geoengineering) to mitigate the devastating global impacts of Super El Niño.

കാലാവസ്ഥാ നിരീക്ഷണവും ദുരന്തപ്രതികരണവും ശക്തിപ്പെടുത്തും: മന്ത്രി ടി. സിദ്ദീഖ്

പുൽപള്ളി പഴശ്ശിരാജ കോളേജിൽ സ്ഥാപിക്കുന്ന ഡോപ്ലർ റഡാർ (Doppler Radar) സംവിധാനത്തിലൂടെ വയനാട് ജില്ലയിലെ കാലാവസ്ഥാ നിരീക്ഷണം കൂടുതൽ കൃത്യവും കാര്യക്ഷമവുമാക്കാൻ കഴിയുമെന്ന് കൃഷി വകുപ്പ് മന്ത്രി അഡ്വ. ടി. സിദ്ദീഖ് പറഞ്ഞു. പുത്തുമല ഹൃദയഭൂമിയിൽ സംഘടിപ്പിച്ച അനുസ്മരണ പരിപാടിയിൽ സംസാരിക്കുകയായിരുന്നു അദ്ദേഹം.

ഡോപ്ലർ റഡാറിലൂടെ മുൻകൂർ മുന്നറിയിപ്പ്(Early Warning System)

പ്രകൃതി ദുരന്തങ്ങൾ മുൻകൂട്ടി തിരിച്ചറിയാനും അതനുസരിച്ച് സമയോചിതമായ നടപടികൾ സ്വീകരിക്കാനുമുള്ള സംവിധാനങ്ങളാണ് സർക്കാർ നടപ്പാക്കുന്നതെന്ന് മന്ത്രി പറഞ്ഞു. കാലാവസ്ഥ മോശമാകുന്ന സാഹചര്യങ്ങളിൽ സുരക്ഷിത കേന്ദ്രങ്ങളിലേക്ക് മാറ്റി താമസിപ്പിക്കേണ്ട ആളുകളുടെ മാപ്പിങ് (Mapping) നടത്താൻ ബന്ധപ്പെട്ട ഉദ്യോഗസ്ഥർക്ക് നിർദേശം നൽകിയിട്ടുണ്ടെന്നും അദ്ദേഹം വ്യക്തമാക്കി.

അതിജീവന പദ്ധതികൾക്ക് കൂട്ടായ പ്രവർത്തനം(Rehabilitation Efforts)

ദുരന്തബാധിതരായ കുട്ടികളുടെ തുടർപഠനം മുടങ്ങാതിരിക്കാൻ ആവശ്യമായ നടപടികൾ സ്വീകരിച്ചതായും മന്ത്രി പറഞ്ഞു. ത്രിതല പഞ്ചായത്ത് ജനപ്രതിനിധികളും ഉദ്യോഗസ്ഥരും വിവിധ വകുപ്പുകളും ഒറ്റക്കെട്ടായി പ്രവർത്തിക്കുന്നതിലൂടെയാണ് അതിജീവന പദ്ധതികൾ (Rehabilitation Projects) ഫലപ്രദമായി മുന്നോട്ട് പോകുന്നതെന്നും അദ്ദേഹം കൂട്ടിച്ചേർത്തു. 

അതേസമയം ദുരന്തബാധിതരുടെ വായ്പകളുമായി ബന്ധപ്പെട്ട വിഷയങ്ങളിൽ അനുഭാവപൂർണമായ തീരുമാനം ഉണ്ടാകുമെന്ന് മന്ത്രി അറിയിച്ചു. ദുരന്തത്തിൽ തകർന്ന ആരാധനാലയങ്ങളുടെ പുനരുദ്ധാരണത്തിനായും ആവശ്യമായ നടപടികൾ സ്വീകരിക്കുമെന്നും അദ്ദേഹം പറഞ്ഞു.

ആത്മവിശ്വാസത്തോടെ മുന്നോട്ട് പോകണം(Message of Hope)

ദുരന്തത്തിന്റെ തീരാത്ത വേദന അനുഭവിക്കുന്ന ജനങ്ങൾക്ക് ആത്മവിശ്വാസം പകരാനും അവരെ കൈപിടിച്ചുയർത്താനും കഴിയുന്നതെല്ലാം ചെയ്യാൻ എല്ലാവരും ഒരേ മനസോടെ മുന്നോട്ടുപോകണമെന്നും മന്ത്രി ടി. സിദ്ദീഖ് ആഹ്വാനം ചെയ്തു. 

English Summary : In a major move to bolster climate resilience and disaster response in Wayanad, Kerala Minister Adv. T. Siddique announced the installation of an advanced Doppler Radar System at Pazhassi Raja College, Pulpally.